الصفر أصل الحساب

كلها مسدودة الدروب بوجهِ الانسانِ الشريفْ
مَـحَّـدِ اليفتحلة بابْ..
ولو لـگـى باب وضوا يـفـرك عيونة...
ما يصدگ باليشوفة،
ولو يمد ايدة تلزمة وتعرضِ بوجهة ظنونة...
مِن كـثـر خيباته كل خطوة ارتيابْ..
والفرج بس الإسم مالة مسمى
والسؤال بلا جوابْ..
والوطن منهوب خيرة...
گـاعة تنبت هم وحيرة...
والفرح شجرة سرابْ..
هو هذا اخر زمان؟...
لو بعد بالدنيا فرصة نعيشها براحة وأمان؟...
لا، أظنها الدنيا وصلت للنهاية
وماكو شي يتصلّح الا ينكسر كلشي ويِـعِـم بيها الخرابْ..
ربي لو تفرجها لو تگـلبها بينا
ريتها الدنيا گـلابْ..
وياحساب الظلم والظُلَّام أرقامك رهيبة
يعجز الحاسوب يحصي
كم جرح كم نكبة كم، كم، كم عذابْ..
كم طفل مقتول، كم امرأة، كم شيخ وشبابْ..
تكثر الأرقام وشما تكثر الله اللي يعدها
ويسلب الظالم سلطتة وقوتة
ويرجعه حافي، يرجعة عاري،
والصفر أصل الحسابْ..