طگ بطگ :. شيعة العمارة مسيح ...!
احمد الياسري

المقالات لا تُعبر عن وجهة نظر الموقع، وإنما تعبر عن رأي الكاتب.

العمارة مدينة مسودنة ، تمشي عكس الوكت دوم، بزمن انقلاب شباط البعثي احتضنت الشيوعين وانقلبت عالانقلابية بزمن القوميين احتضنت الشيوعيين وانقلبت عالقومية ، رجعوا البعثيين وصعد صدام احتضنت الإسلاميين وانقلبت عالبعث ،، سقطوا البعثيين ودخلت الديمقراطية الفاسدة انقلبت عالفساد وانتخبت شخص إسلامي بمواصفات شيوعية .. واقل محافظة بملفات الفساد بالجنوب واكثر محافظة منجزة،
طگت الطائفية وصارالعلس الطائفي بالقنادر احتضنت السنة والشيعة وماصار بيها حادث طائفي وانقلبت عالطائفية الي احتضنتها كل محافظات العراق ....البريد يصير رئيس لو قائد ديني بالعراق وماعنده علاقة بالعمارة يفشل .. لان عدها امتداد بكل المحافظات العراقية من كركوك للبصرة وأهل العمارة صعب يتجردون من ارتباطهم بالعمارة لو يسافرون للقطب المنجمد ، القادة والمفكرين والشعراء والشيوخ والمطربين والفنانيين اغلبهم من هاي المدينة لذلك مرات احسها مدينة مسودنة ماتهدأ ودوم منقلبة على واقعها ..
هاي الصورة لتقرير تلفزيوني يظهر شيعة العمارة وهم يحتفلون بمولد المسيح والكارثة من سال المذيع احد المحتفلين انت مسيحي ؟ گالة لا اني شيعي ..!
گالة شعندك جاي تحتفل بمولد المسيح گله اني من العمارة ..وهاي عادتنا والمسيحيين چانوا يحتفلون ويانة عالحسين ... الصحفي الملتهي بطراگيع الحكومة وتسقيطه للصحفيين الاخرين بالفيس بوك يمر على هذا الخبر مرور اللئام ، بس الصحفي المعيدي الشارب روح ابو گاطع مايگدر يغلس على رقي محافظة العمارة وأهلها ، الظاهر هاي المدينة هي مومياء سومرية عايشة ويانة من الآلاف السنين نتعارك وي التفسخ حتى تثبتلنا هويتها السومرية الحقيقية الانتماء الى سومر لعنة فراعنة تخليك تمشي بالمگلوب وعكس التيار .
اكو محافظات عراقية گاز وبنزين تغير هويتها وتتنكر لعراقيتها اسرع من الريح .. يوم أشوفهاشيوعية يوم بعثية يوم دعوچية يوم وهابية وتنهش بلحم أولادها نهش .!
العمارة هم تنزع جلدها مرات بس ما تاكل ويلادها ، تصير كردية اذا اهل علي الغربي صابهم ضيم .. وتصير سنية اذا انكتل سني بسوگ الشيوخ لو الزبير .. وتصير شيعية اهل طوزخرماتو حشموا ومحد فزعلهم .. وتصير مسيحية وتحتفل بميلاد المسيح اذا اتفجرت سيارة مفخخة بكنيسة بسوگ الآشوريين بالدورة وشافت دموع المسيحيين على خدهم بيوم فرحهم .
العمارة دائماً تحاول ترسخ ابالنا مفهوم الشرف والغيرة والتعايش والمحبة .. شيعة العمارة اهل نخوة ،وسنتها اهل عزم ،وصبتها اهل طيبة، واكرادها اهل بسالة ومسيحييها اهل عاطفة وحب ،

أتذكر من ردت اشرد لإيران بداية التسعينات ضيفني زلمة من السواعد بالهور عشر ايام ، هجمت عالمنطقة قوات الحزب واني گاعد بمضيفة خفت وردت اطلع من فتحة خلفية للمضيف لزمني من ايدي گال وين شارد؟ گتلة خالي البعثيين اجونه گال سيد شبيك اتخبلت تريد تفضحني بالسلف البعثيين يوصلوك من ننذبح اني ويلادي انته الظاهر يا سيد ماتعرف اهل العمارة مايطون دخيلهم .واذا اكو بعض الهتلية المحسوبين على العمارة فذولة يا سيد ماشاربين ماي عمارة ..!
حقيقة ذاك الحجي الي نسيت حتى اسمه بس مانسيت موقفه الشريف واني مدان للعمارة وأهلها بحياتي وحياة عائلتي .. لذلك ادعو اهالي المحافظات العراقية جميعا وهمه كلهم غانمين وأهل غيرة بس ادعوهم ان يتسودنون مثل سوادين العمارة وأهلها اذا رادوا يحاربون الارهاب وينتصرون عالطائفية ..

 

الموضوع السابق ساحات العز تقطف ثمارها!

قناتنا على التلغرام : https://t.me/kitabat