رسائل من أهالي القنال إلي الحاج مرسى
محمد ابو طور

المقالات لا تُعبر عن وجهة نظر الموقع، وإنما تعبر عن رأي الكاتب.

عم الحاج ، العزيز ، رئيس الفترة الانتقالية.

 

نحن أهالي محافظات القنال الثلاث " نحب على أيديك، يعنى نبوسها ، وراسك كمان , ونترجاك تسيب لنا الحظر شوية.

 

يا راجل إحنا ما صدقنا نسهر ونخرج وننبسط ونفسح العيال ونقابل أصحابنا.

 

أحب أقولك العيال فرحانيييييين قوووووووى علشان الفسح واللعب والسهر فى الشوارع والجنايين لوش الفجر ، وأهو فرصة نصلي الفجر حاضر علشان مش تعايرنا بعد كده بصلاتك.

 

و بنتى كمان حملتني رسالة ليك يا عم الحاج .

 

من ابنتي ذات الأربعة عشر ربيعا إلى القاطن فى دير الاتحادية  :

"سيب الحظر كام يوم ، ربنا يحظرها عليك دنيا وآخرة...يا عمو"

 

ومن شباب القنال إلى عم الحاج:

 

" سيب الحظر لغاية ما نسلم كأس الدورة الحظرية الكروية ".

 

ومن جدي العجوز صاحب الـ 90 عاما

 

" يا ختى كميلة يا أولاد ، حظر ... خير الله ما أجعله خير ، هما الانجليز رجعوا تاني ، هات يا واد البندقية من الصندره ، أما أروح أشوف ولاد .......... دول ، عايزين إيه"

 

ملحوظة : تم حذف بعض كلامات جدي لعدم صلاحيتها للنشر.

 

ولأن ساعة الحظر ما تتعوضش ، فبعد أقل من 48 ساعة على القرار المفكوس ، فوض عم الحاج محافظي القنال فى تخفيف أو إلغاء الحظر، تنكيدا على الشعب المبسوط.

 

الله .... هوا عم الحاج ما كانش لسه خلص قراءة كتاب التاريخ بتاع تالثة إعدادي اللى بيتكلم عن انجازات مدن القناة ونضالهم ضد الإنجليز والصهاينة ، ولا أيه ؟.

 

ما حدش قاله من جماعته أو مستشاريه إن دى بلاد رجالة ، ولاد رجالة ، أحفاد مناضلين وفدائيين ، قهروا غزاة بجيوش جرارة منظمة ، وأتهدمت بيوتهم عشرات المرات وأعادوا البناء على أنغام السمسمية.

 

ثم ، هو أنت ليه بتتراجع دايما فى قراراتك ؟!!!، هي لا مؤاخذة مش بتبقى مدروسة ، ولا هما قالولك أعمل كده .

 

على العموم ، خلاص ، سجل التاريخ انتصارا جديدا لأهالي القنال فى معارك العزة و الكرامة ، تحت عنوان لن نركع إلا لله الواحد القهار.

 

عدوان مستورد ، عدوان محلي ، لن تجدوا لدينا إلا أقوال جدى الخالدة " يالا يا  ولاد ........من هنا ، روحوا ألعبوا فى حتة تانية"

الموضوع السابق المحكمة الاتحادية قاب قوسين

قناتنا على التلغرام : https://t.me/kitabat