يسولنا مشكله كل عشر سنيين

وهذا دومنا من سنه الثمانين

اولها قادسيه على الايرانيين

بحجة انهم فرس مجوسيين

وثانيها حرب لتحرير الكويتيين

من غزو ابن العوجه ورفاقه البعثيين

وثالثها حصار لا يشوفه لاحد رب العالمين

مر بيها علينا بايام سوده وسنيين

طيرت نص العراقيين

بالجوع والمرض ماتوا خطيه مهضومين

وجتي الرابعه على اساس متحررين

وما صدكنا انشم نفس لو نفسين

واخذنا الواهس بسنه لو سنتين

وعفينا على اللي ظلمنا وما ردين الصاع بصاعين

اجونا من كل صوب وحدر تكفيريين

يصيحون انتوا عملاء يا العراكيين

لانه اللي دخل بلدكم امريكيين

سنتكم وكردكم مرتدين

وشيعتكم صفويين

وباقي الشعب كله كفار ومشركين

جا بويه يعني بس انتوا مسلمين

وغيركم ومنهو اللي يخالفكم ملحدين

ونزلوا بينا نزل كل يوم انفجار لو انفجارين

يروح بيها بالشهر الف لو الفين

شهداء وجرحى من ولد الخايبه المساكين

وابتلينا بحكومة وبرلمان حراميه واميين

ما يعرفون الا الخمط وعقود وهميه همين

جيوبهم املت ويصيحون بعد وين

ومرت سنين تركض ورا سنين

فزينا من النوم واحنا بشهر رمضان صايمين

على الخامسه دنشوف طارت أم الربيعين

ناس تكول هذوله داعش السعوديه وهابيين

وناس تكول لا هذوله ايتام صديم البعثيين

وناس تكول تره بويه هذوله الاثنين مجتمعين

دومهم على خراب العراق متفقين

كالها ابن صبحه الا انتوا ما سمعتوها زين

اريد بالعراق بس مليونيين

كلهم يصيحون ما النا غيرك يا ابو الليثين

وهاي الطاسه والحمام اللي بيها مجلبين

وبيها طار نص شعب العراق مكتولين

غير اللي تاه بالدنيا مع التايهين

وغير اللي تسجل اسمه بقائمه الامم المتحده مع المشردين

وآخر بسته تفجير مراقد الانبياء والصالحين

بدايه لخراب الاقصى اولى قبلة المسلمين

حتى يبنوا معبد سليمان للجن والشياطين

بويه زهكت انخيكم اشوكت تنتبهون

هاي الدنيا ما تسوى عفطة العنز يا ريت تفتهمون

لو دومكم نايميين وبعد ابد ما تصحون

الا بالموت.........نادمين.

 

اللهم اشهد اني بلغت.................

29-07-2014م