• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : رايد فرح .
                          • الكاتب : حيدر حسين سويري .

رايد فرح

انا ما رايد سما تمطر سراب

انا رايد لي ارض تنبت فرح

تدري ملينا الكتابة اعلى التراب

بس تمر ريح اتذرى وتنمسح

يمته يسمع صوتنا وينطي جواب

لو اذان الطرشه عنده المنسدح

مو صرت مسؤول والوجبه كباب

وحصره ع الناس الخبز وي الملح

انته طبيت التجارة امن أقسى باب

باب بي بس الخسارة، تبره من عنده الربح

لان اعمالك مثل مر السحاب

لا يغرك ليل فاسد لابد يفضحه صبح

جنت أصلع راسك ولا شعره طاب

صار شعرك اسود وكَذله وسرح

وجنت تصبح وجهك ملطم كآب

وهسه صاير لوتي وجدا مرح

خلص عمرك لا قراءة ولا كتاب

ولو حجوا بالدين جداً تنشرح

هنه جم جلمه وتطكَطكَـ ع الشباب

وأنت تالي الليل بيه تنطح نطح

ولو خطبت تكَول جن جهرة غراب

عاب حلكَك يالفكَر وجهك جلح

احنا ملينا الخطب يبن(الاطياب)

نريد واقع نحيا بيه كلنا مرح

ليش من دون البشر احنا بعذاب؟

وليش من دون البشر بينا جرح؟

لان ما نرضى بولي غير أبو تراب؟

هذا حبنا وأبد ما نقبل جدح

احنا وي حيدر علي اليوم الحساب

وانت وإسرائيل وامريكا شطح

روح أفلت ما إلك يمنا متاب

احنا كل مدة بـ(علي) النا فتح

احنا أبو محمد رضا عدنا مآب

وانت إلك يوم النشمرك من سطح

 29/ 6 /2021




  • المصدر : http://www.kitabat.info/subject.php?id=157555
  • تاريخ إضافة الموضوع : 2021 / 06 / 30
  • تاريخ الطباعة : 2024 / 03 / 29