• الموقع : كتابات في الميزان .
        • القسم الرئيسي : المقالات .
              • القسم الفرعي : المقالات .
                    • الموضوع :  راب .. وخروف...!! .
                          • الكاتب : احمد لعيبي .

 راب .. وخروف...!!

قبل سنوات خابرتني امي كالت يمه اني كاعدة يمك بالاستقبال واجه زلمة عبالك سيد وترس البيت حنه ويكول البارحة شافك تفتر بالكعبة وكايله انت بالحلم اريدك تجيبلي طلي للبيت ...!!
كلتلها يمه زين اكو واحد بالكعبة يطوف وبعقله طلي زين خوب اكله جيبلي سيارة ..موبايل ..ساعة ..ليش الا طلي ..
كلتلها المطلوب شني يمه .
كالت الزلمة بالباب ويكول اريد فلوس اشتري الطلي واجيبه بيدي ادخله للبيت وبعدين ادفعلكم الطلي والفلوس من اجيكم ..
كلتلها يمه هذا كلاوجي وحرامي مبين..
كالت يمه العباس الحسين وجهه ينكط نور ودم ..
كلتلها شكد كالك يريد فلوس ..
كالت يريد مية وخمسين الف ويجيبهن من يشتري الطلي ..!!
كلتلها انطيناياه خل احجي وياه..
كتله سلام عليكم حجي شنو سالفة الطلي ؟
شو هذا جاوبني فصيح(ان الخروف قربان لله لسلامتكم وسلامة امام زمانكم واحتاج ان اشتريه من سالم حلالكم ثم اعيده لكم مع القربان وهذا امر الهي وليس امري )..
كتله الله صاحبي شو ما كالي هذا امر وبعدين كان كالي مباشرة بدال ما يكلك ..بعدين اني ما عندي هالمبلغ ..
كال (اعطني مما متوفر في بيتك وانا اكمل الباقي فان في الخروف دفع بلاء )
كتله عندي الف دينار تفيدك مخليها يم الحجية وبعدين هذا يا خروف اللي يجيك بالحلم..
صفن شوية وقبل لا اسد التلفون بوجهه كتله انطيني امي لان خفت يبوك تلفونها ويشرد ..
كلتلها يمه اسمعيني ...
اخذي تلفونك وسدي باب الحوش بوجهه وكليله احمد تحلم بيك انه انت حرامي وراح يخبر الشرطة وكالي خليه واكف بالباب لان بالحلم هيج ..
الزلمة عاف امي وركض بدون انعالاته ..
امي صايحه وراه ..خاله هذا الالف تعال ما تاخذه..😁😁😁😁
امس تذكرت الحادثة من شفت الشور المهدوي والراب مال الصرخي ذلك الطالب الفاشل الذي يدعي الاعلمية واهازيج جماعته المدفوعي الثمن لا خمر ولا هروين..رابي افضل تحصين..
وراب السيد ماخذ شمرة من العباس ..ومخلي الشباب والشياب تتراعص بالشوارع ..
وطبعا فعاليات مدفوعة الثمن لتشويه الدين والاخلاق وتنفير الناس من كل شي ..
ولا ندري ولا المنجم يدري لماذا سكوت الدولة عن الصرخي المنحرف وجماعته المنحرفه الذين تعدوا كل اطر الحرية وتمادوا بالتشويه والواضح انها افعال وحركات ممولة ومدفوعة خارجيا..
وخاف الصرخي يجي ويكول اني المهدي لان هو قبل سنوات كال اني نسيب المهدي ..!!
الى من يهمه الامر استفيقوا يرحمكم الله..




  • المصدر : http://www.kitabat.info/subject.php?id=131641
  • تاريخ إضافة الموضوع : 2019 / 03 / 21
  • تاريخ الطباعة : 2022 / 01 / 20