حكايا العم ((وجدان )) في ديوان الحاج ((مردان))(( التجاوز)) ح3
حميد الحريزي

المقالات لا تُعبر عن وجهة نظر الموقع، وإنما تعبر عن رأي الكاتب.

يبدو ان  الحضور   في الديوان  اصابهم  الملل  ، وانتابهم  القلق بخصوص   العم ((وجدان )) ، فقد تاخر  كثيرا   عن الحضور   وليس كعادته في كل مره .....فانبرى  الكهوجي  يسال  عمه  ((مردان ))

- حجي   اشو  انه بالي  يم  عمي  (( وجدان))  اشو  اتعطل اليوم  شنو سالفته ؟؟؟

والله  يابه  اني  هم مثلك  مستغرب .. انكول انشالله خير  يجوز صار عنده شغل  بالدرب ،يو  واحد  من وادمنه  كلفه  بقضية  تدري   عمك  وجدان  كل الناس  اتحبه  وتقدره   لذلك  تتعناه  الوادم   لقضاء  حاجه   او حل مشكله   او  حضور مشية  فرح  لو صلح .........

عموما منا  لبعد شويه  الا ما اجه  اود  واحد  لبيته يشوف  شنهو  العطله  ....

كل العيون تراقب  طريق   ((وجدان )) وتترقب  حضوره  كما  يترقبون  هللا العيد  كما  كانوا   يقولو له عند حضوره .....

اي والله  اظنه  ذاك  المجبل علينه ..... توجهت كل العيون  وركزت على  اتجاه  الاشارة  من قبل  الكَهوجي ....

اي اي   هو هو  .... الحمد لله والشكر 

....دخل  وجدان   متوكئاً على  عكازة من  الخيزران ، وكان يبدو متعبا  ومهموما ..

السلام عليكم  ...

وعليكم السلام ورحمة الله وبركاته  رد  الديوان  جميعا ...

امر  له   مردان   بكَلاص  ماي   بارد  ... ولكم يبين الحجي تعبان ..

اي والله حجي رحم الله والديكم  والله  يابه  اني اعتذر عن   اقلاقكم واشكركم  لاهتمامكم بيه  لكن  والله   العوﮔني  اليوم عنكم   ، شي  لا الله  ولا عباده الصالحين يرضون بيه  

خيرك  حجي  شنهو القضيه ..

عمي اريد  اسال   الرصيف   البشارع   ملك  واحد يو ملك   كل  الناس ؟؟؟

لا طبعا ملك  كل الناس ؟؟؟

زين اهو المن مخصص؟؟؟

طبعا   مخصص   للناس  المشايه    حتى تكون  مامونه من  السيارات   والدراجات   والعرباين  وغيره 

زين  من كون   الوادم  تعرف هاي  القضيه   ... ليش  ابو التكان   ساد الرصيف  بسطته    وابو السياره  ساد الرصيف  بسيارته ، واحد  مسويله  سياج  وحاجز الرصيف  ومخليه تابع  لبيته    عود زارعله  الاخ شجرات ، واحد  ساده  برميل النفط  ،  والاخر امسويله   علوه  بالباب  محد  يﮔدر  يصعد عليه.......وهاي الشغله  ما اجت  من  فراغ   لكن  ايﮔولون ((الناس  عله دين حكامه ))، 

يعني  شلون  حجي؟؟

عمي  تشوف  المسؤول   بسيارت  المضلله   لايعرف  اشاره   ولا يعرف خط  سير ..... رواتبهم  ومخصصاتهم بكيفهم  بالمليارات ، رتبهم    وسكنهم   بكيفهم  ، ايفاداتهم  بكيفهم ..... 

اريد اﮔول  ان كل  هاي اليسونه هي تجاوز عله الشرع  والقانون  وعله حقوق  المواطن ، ومن شافتهم الوادم   ﮔامت  تقلدهم  وما  تحترم  لا العرف  ولا الشرع  ولا القانون   او الك ياطويل  الذراع ....

او هل التشوفون   شلون انه  اجيت اتعكز  لو  ما الله يستر  وانتبه   ﮁان  اليوم   انه  بالﮔبور   امكان   ﮔعدتي  هاي  بديوان مردان ،  من حيث  لختني ستوته  من  نزلت  للشارع  لان الرصيف   ساده   مرحوم والدين  امسويله  حديقه  عله الرصيف .....ويكولون  ﮔبل اسبوع  مره جبيره  هي  وابن ابنه سحﮔتهم  سياره   ابنفس الشارع ....

عمي ليش لاتخافون ضمايركم  ولا  عرفكم   ولا دينكم ولا تخافون القانون .....؟؟؟

عساه  بركبت كل مسؤول  لايخاف  الله  ولا  بنادم ولا القانون  ....((اذا رب  البيت على الدف  ناقر ....))

اطني عمي اطني فنجان ﮔهوه ....... لابو  المحاصصة لابو برايمر.....

الموضوع السابق الإعلانات الكاذبه = ثقافة كاذبة = إدفع مافي جيبك ولاتفكر .

قناتنا على التلغرام : https://t.me/kitabat