لأتراب هذا الوطن, أسجد انا راسي
دلال محمود

بايدي انه جبت القهر
رحت انه واتعنيت
شفت القهر منقهر
صافن يعظ شفتين
ناشدني انت منو؟
معقولة انت افلان
لامااظن واعتقد
مو انت ذاك الزين!!!



باحلى الملامح جنت
وينه جمالك وين؟؟
غدار هذا الوكت
من دون علم او غفل
يسرق عطور الهيل
اتمنيت اظلن طفل
اتناغيلي امي اصبح
واركض زحف لابعيد
اوصل الحد الجرف
الحك ابوي السمح
يحضني بالجفين
يحوطني بادفيء حضن
يحميني من كل عين

من حب ابويه انا
حبيت كل اعراقي
ولاتراب هذا الوطن
اسجد انه راسي
اشكد صعبه عندك وطن؟؟؟
واتنام بره الوطن
وراسك يظل ناصي



اتمنى طفله انا
واستوني امشي اداد
والباب لمن يدك
اركض واروح اعليه
والكى ابوي الحلو
جن تعبه تعب اسنين
بس كلمه مني انا
ترجعله كل الحيل
باباتي يااغلى ابو
اشلونك دكولي زين
اتنسيه كل التعب
وج انتي كل العمر
يابعد اهلي وناسي

من حب ابوي انا
حبيت كل اعراقي
ولاتراب هذا الوطن
اسجد انا راسي
اشكد صعبه عندك وطن؟؟؟
واتنام برة الوطن
وراسك يظل ناصي

وابحضنك انت ياوطن
ضميت اسود كلب
اوكل اناني او قاسي
امغربين احنا ياوطن
رحاله احنه ياوطن
اكرهت انا كل امل
وانزعت كل احساسي

اشكد صعبه عندك وطن؟؟؟
واتنام بره الوطن
وراسك يظل ناصي
اشكد صعبة عندك وطن
واتنام برة الوطن
وراسك يظل ناصي؟؟؟

الموضوع السابق في الكتب الصفراء...أنا؟!

قناتنا على التلغرام : https://t.me/kitabat