حسرة المغرور
سعيد الفتلاوي

شجاها الناس مغترّه وْ تِعمر قْصور

وْ نست يوم الحساب وْ حسرة المغرور

 

عله الدنيه وْ عله المنصب عِمت العيون

شجاها غْترتِ وْ تركض ركض مجنون

 

عجيبه شْبيها ملهوفه وْ تطيع ابليس

غواها بْدنيته وْ صارت عليه تْقيس

 

اذا تنظر عملها الباطل تْولاه

بَناها الباطل يْدوم وْمشت ويّاه

 

ابد غير العدل ما دامت مْن اعمال

ظُلم كل باطل نْزاح وْ چثيره امثال

 

طواغيت نْفنت شذكر واعدّ اسماء

شجاها الناس تتراكض عله الاغواء

 

مُلك فرعون قارون وْ مُلك هارون

نْفنت ذيچ القصور البيها يتباهون

 

المُلك بس للاله الكل مصيره يْموت

تِعمّر تبني ما تبني وْ تشيد بيوت

 

الك يوم التشوفه وْ تعتصر حسرات

شْتِجاوب من تشوفه الهادم اللذات

 

ابد ميفيدك الجاه نْتهت دنياك

وْمُلك ذيچ القصور الفانيه ويّاك

 

صحيفة اعمالك التشهد عليك اليوم

بْحياتك ما عنت حاير ولا مظلوم

 

يمِن خنت بْوعودك وي هلك والناس

چذب كلّك چذب من ساسك وْ للراس

 

غرورك وين ودّاك وْ غواك الجاه

هِملت جْروح ناسك ما جرعت الاه

 

وْ هِجرت الخير والمعروف والاحسان

عله الايتام ماحن گلبك وْ جوعان

 

يتافه ما يفيد المال والاولاد

ولا جاه اليفيدك ساعة الميعاد

 

اجاك الما چنت تحسبه كل حْساب

اجه المكتوب عالگصه وْ ترد تْراب

الموضوع السابق نافـــــــــذة

قناتنا على التلغرام : https://t.me/kitabat