صفحة الكاتب : وجيه عباس

حلم ليلة حيف!!
وجيه عباس

المقالات لا تُعبر عن وجهة نظر الموقع، وإنما تعبر عن رأي الكاتب.
أبو علوان لم يبق في قارورة قلبه الا (الوشالة)... لقد تيبّس قلبه مثل واحد منتول بكهرباء ثري فيس... هسه هو فيس واحد يلعب بالواحد طوبة ....انوب ثلاث فيسات!!....
حين يزور الحب قلباً فحطاناً مثل قلب ابو علوان.... فانها احدى خمس مسائل...يعني ثلاثة...وهي اما انه سيصاب بجنون البشر....أو يصاب بجنون البشر!!...والظاهر ابو علوان انصاب بالاولى...وبعد روحي روحك ابو علوان.."نايم .ياشليف الصوف...نايم والبعورة إتحوف"....عايف البلد وجسر الصرافية وملتهي بقلبك....هسه المجاهدين يقولون عليك مرتد عاطفيا ويحللون ذبح قلبك من الوريد للوريد....بويه هو اني باقي بيّه وريد صاحي...شوهاي ميمي اعلى الله مقامهه مشوفتني النبي عربي ....
نام ابو علوان وتحت فروة رأسه عوالم "ماانزل الله بها من"... لبسان...لكن وجه ميمي يخرج به مثل زعطوط من باب الوعي الى نافذة اللاوعي....اشتعل ابوك فرويد شسوييت بينه؟....خواطر واحلام....همّها الاول والاخير إنقاص وزن ابو علوان خشية صعود جبال الميميلايا الموجودة فقط في تضاريس ذاكرته المعطوبة مثل تاير ابو الريحة أخرج من مقابر الإطارات الجماعية تحت شعار يخيّط الأخيار مابنجره الأشرار!!
هو شنو الحب ابو علوان...شنو انت ماشايف مرة...ماكَاعد وي مرة!....مانايم وية مرة!!لعد شبيك رب الطرمبة صاير مثل وائل كفوري؟
أخجل ابو علوان القضية العراقية في مجلس الأمم المنتحرة....ابو علوان عميل لجهاز الكية جي أم سي... لايأتيه البالطو من بين يديه ولامن خلف عقاله...العقال في هذا الزمن تبرّأ ممن يحملونه حين هتفوا بالعراقيين... زواج عجيل الياور من نسرين برواري باطل فتناسلت قضية كركوك من.... لبن أربيل...
نام ابو علوان....وحده مثل كيس لحم متروك في بطن الثلاجة...الأحلام تخر من أذنيه كما تتصاعد اوهام الفريزر وهي تغلّف اللحوم بقبل بيض ....
أبو علوان حزين لسبب لايعرفه...والله لويعرفه لقال لكم...هو صونده وحدة بمديرية امن الكاظمية حجه مذكراته الشخصية كلها بربع ساعة.... انوب وي قراء اسم الله عليهم كلهم صايرين نقاد!!...المهم ابو علوان ادخل الى جنة الحلم...لن تستطيع بناء الوطن الا من خلال الأحلام....الحكومة الوحيدة التي تستطيع اعادة العراق الى ماكان عليه هي حكومة وحدة حلمية....في الاحلام كل اوهامك صحيحة...الدستور له عدة أوجه لايتنازل عن جهة دون اخرى....علماني على مشكل ليبرالي تشريب ديني...شوربة شيوعية...لطمية شيعية....درباشة سنيّة...وزلاطة مجتمع مدني وصحن جاجيك حقوق إلسان مال خروف...باجة مباديء قومية على ضلوع مذهبية على شحم طائفي...على لحم حزبي.... والبرلمان .... ملائكة شارلي المشهداني..كل واحد بيهم ألن ديلون بزرّه...وكل وحده بيهم ..الأم تريزا...خطيه تعبانين والله...كل واحد بيهم صاير حمّال لهموم الناس...يعملون براتب أحمد رمزي ... 100 دينار عراقي لاغير والغلط مرجوع للطرفين....ويوميّة طالعين يزورون فواتح العالم ويركبون بالكيّات..وكلهم...مؤتلفين وتوافقيين وحواريين.....وانوب يتداينون فلوس الواجب من حمايتهم... كلهم صايرين رؤساء عشاير حوك....ديمقراطيين....لعظم القص والسرد....ماعدهم حمايات(لاسامح الله والقانون!!) يرمون بالشارع طلقات من الصبح لليل...وخروا راح يفوتون اعضاء مجلس النوايب....طاق ...طيق... طاق ....طيق....ولاميليشيات وحدة تملّخ باللاخ....والدخول الهم مسموح للجماهير 24 ساعة....كل واحد فاتح مضيف بني هذال للناس....وهيئة النزاهة لاراشي الراضي ولا دبس أي أي...ماكو حرامية وفلوس الدولة تتوزع بالتساوي على فقراء العراقيين ..وهكذا...كلها أحلام مستغانمي في ذاكرة جسد الفجيعة في العراق...ومالم تر الدم في نهاية الحلم....فاعلم ان حلمك مقلوب على البطانية...يعني راح تنسمط انت والحماية سمطة الذين حكموا.....ابو علوان صير....روليكس ...يعني ساعة سويسرية...لاتقدم ولاتأخر......حكومة احلامك في نهاية سنوات حبلك وحكمك الاربع تلجئانك ان تهوّس معها.......ليلى ردت لعيالهه وطير السعد يبرالهه!!!...
ربما يتصوّر أبو علوان في جمهورية أحلامه أن يبدل وجه أم علوان الذي يذكّره بخضيّر هادي أنه بحاجة إلى عجرمة أم علوان أو يلصق عليها صورة هيفا وهبي،وربما تحسب لأبي علوان أول حركة علوانية لعجرمة العراقيات(وأولهن عضوات مجلس النواب طبعاً!)....وربما لو تجوّل في بيته قليلاً ستتحول قنينة الغاز العزيزة إنتِ...إلى أنابيب غاز تغذّي البيت بالتدفئة المركزية...ولوتجوّل أبو علوان في البيت وصادف (وأكرر صادف!!) أن إنقطعت الكهرباء عن داره...سيفاجأ ببابه يطرق بشفافية ويقف على عتبته وزير الكهرباء وهو يحمل كيبلات يوزّع على الناس...يمعوّد أبو علوان أخذ هاي الكهرباء الزايدة ببلاش...ليش نشمرهه بالصحراء!!وفيما هو يقف على الباب مع وزير الكهرباء...تـمر أمامه عربانة نفط يجلس عليها وزير النفط وهو يصيح...نفط...نفط.... وإستغرب ابو علوان من كذب المعارضة النفطية التي إتهمت وزير النفط بتهريب النفط بواسطة قاطرة ومقطورة!!...يمعوّد أبو علوان وين الجلكانات مالتك؟....ماعندك؟ الوزير يخرج من جيبه نقوداً...تعال أبو المضخة جيب لبو علوان 10 جلكانات إترس له بانزين ونفط من أجل بناء الوطن!!! وبدربك جيب له عطر البنزين الإئتلافي وشامبو بنزين القائمة العراقية وصابون توافق البنزين....بس أبو علوان دير بالك لاتخلّي علوان يشعل شخاطة يمك تره يسويك فحم...وقد أعذر من فوّل......
يستمر الحلم الحكومي ...سيجد وزير التجارة يجلس على باب وكيلة الحصة التموينية لفصل برادة الحديد عن الشاي وتكسير السكّر الذي تحوّل الى حجارة بسبب نفاذ صلاحيته وأفتى لهم الوزير بتهشيمه بواسطة العصي والكيبلات!!...ووزير الصحة يأخذ الأدوية لتوزيعها على بيوت المرضى المصابين بالأمراض المزمنة... فيما يجد أن وزير الدفاع يوزّ‘ للجنود وروداً مثل غاندي...ووزير الداخلية يأكل مع الموقوفين...خطية حتى الأكل مامتهني بيه....ومن يوصل للجسور ويشوف الإزدحام....يتصور أن السيارات حدائق وورود...أبو علوان روح الهوه بظهرك....وإذا شاف سيطرة مال جيش أو شرطة أو غرهابيين يتورهم مشجّعات كرة سلّة أميركية....يحلم أبو علوان على خط محمد القاسم السريع أنه متجه إلى مضيق البسفور يرسم للباب الشرقي أبواب الدنيا...وإذا سمع إنفجار عبوة ناسفة بحلم ...فهاي نفّاخة طكَت علمود يكَولوله الأطفالز..كل عام وأنت بخير...وإذا سمع إنفجار سيارة مفخخة يتصورهه هلاهل مرة إمعدّلة!!
هذيانات على ذمة التحقيق.... مجنون يبحث عن عاقل يملك ذرة عقل في هذا الزمن الشاذ... من يبيع ومن يشتري.... ومابين الرايح والشارح يفتح الله....وافتح مزاد قلبك ابو علوان....اين تذهب والبحر من وراءك والعدو من أمامك يابن الكلب...انت وينك ووين الحب....عمي تره المحبة صايرة نخاسة بهذا الزمن الفحطان....كلهم انبياء الا انت...ايها الشيطان الكافر برب هذا الزمن الأحدب....ظهرك جسر الصرافية...وكلهم يبحثون ان يكسروه لك ايها الفقير في زمن العولمة....ليس سوى دمعك في زمن الانبياء الجدد....انبياء القتل الإلهي....اين تخبيء قلبك الفطير ابو علون؟....كل القطط تبحث عن قطعة لحم طاهرة مثل قلبك....والناس على دين كلابهم.
ابو علوان...ايها الحالم في زمن اغلق الحلم بواباته...ليس سوى الحزن يغلف عينيك اللتين ابيضتا من الحزن....هل قلت لك ان عينيك عالمان من البراءة تخفيان وطنا مثقوبا مثل راس صديق عمرك الذي قال للرصاصة ادخلي...ستبرّد نارك دمائي المطمئنة مثل روحي....اين تهرب بضمير مثل ضميرك ايها الغريب حتى عن جلدك وروحك التي تهيم في دنيا البشر.... 
اين تجد ارضا لسفينك الموحش....ريح التغيير ستلجئانك الى منفى تدفن فيه اضالعك التي اتعبتها بالخفقان....ولك لو تسوة العتب جاعاتبيتك...بطران تبحث عن قلب يعرف حزنك هذي الليلة.... والليلة اموت الليلة...الليلة اخر ليلة..ترسم وجها لحبيبة تسمع صوتها بين أنين روحك وأزيز الطائرات الحربية.....وأنت تودّع بلاداً لم تلد سوى الخوف منك انت فقط!!
ايها الحزن متى تفارقني...دخيل الله عوفني...شنو جلّبت بيه...ماكو غيري ابن الكلب...
كانت تلك آخر كلمات ابو علوان وهو يغلق (كبنكَـ) أهدابه على جفونه....قبل أن يسلم خياله الى عربات الحمير التي تقوده أعمى العينين إلى مجاهل الأحلام.... فزّ من نومته وهو أسود البشرة...ويجلس في خيمة للحرب....فجأة يدخل عليه الحاج دريول وهو يلبس لباس الحرب ويقول له: سيّدي عطيل....لقد عرفت أن دزدمونه تخونك....لك شنو دريول حتى بالحلم بعدك نايب ضابط...شنو بريمز مال توريث؟....آآآآآه أيتها السماء إشهدي على قلبي لقد طعنته ميمي بوجه دزدمونه....إذن فليس لي غير هذا الثأر الذي يتقد بين أضالعي مثل ميليشيا زرقاوية....أين أولّي وطفح المجاري ملأ دروب المدينة....من أين لي ولد أبيض وأنا أسود البشرة...أنها تخونني مع البيض....هل إستكثرت أن تعطيني ولدا أسوداً مثل وجهي؟....يدخل ابو علوان وهو يتقمص دور عطيل....ابو علوان شلّك بهاي العطلات يمعوّد...هسه ماإختاريت غير واحد يشبه قلب العدو الأنسكلوبيدي...هسه فوكاهه ابو علوان؟...يدخل ابو علوان وهو يقول لميمي...دزدمونه...يمعود ابو علوان آني ميمي...خلينه نكمّل الدور بالحلم....نعم حبيبي عطيل....
- هل خنتني ياميمي؟ ...لا والله والعباس ماخنتك....(ابو علوان همه الرومان يعرفون العبّاس؟ )....سأقطع رأسك بسيفي هذا الذي دافعت به عن حدود قطاع 27 ....[ كلما اراد ابو علوان ان يسحب السيف من قرابه امتنع السيف عن الخروج...ربما كانت تلك ارادة الهية ان تمنعه من قطع راسها مثل مقاومينا الاشاوس الذين استبدلوا السيف بسكاكين المطابخ....لكن التاريخ يذكر ان ابو علوان لم يستطع جر السيف لان القراب كان مملوءاً بماء المجاري فزنجر السيف واصبح مع القراب قطعة واحدة....ابو علوان ممثل مسرحي يعرف هاي الدوالغ كلش زين.... رمى السيف جانباً....واستمر بتأدية دوره الذي ابتكره لنفسه....إن رفض السيف قطع رأسك..بعقالي اهفج وبالشطفة اخنكَج...ولك عيب مو الشيوخ شراح تلبس والعجل يابه ويالحبيّب ييابه...شلون يغنوهه ....هاتان اليدان هما سيفي الذي أرسلك به الى الموت بالكيّات....سأخنقك بيديّ هاتين اللتين حملتا لك الورد في نيسان....وجاءت لك براس الفجل في ايار احتفالا بعيد العمّال العالمي......تسقط دزدمونه تحت تأثير يديّ ابو علوان مثل خروف مذبوح لايملك الا التسليم بقضاء الله وحكمة القائد الضرورة.... [ ينتبه ابو علوان من منامه....اسم الله ابو علوان...وين الماي ولج بنت الكلب....نشف ريقه المسكين وهو ينظر الى يديه غير مصدّق انه خنق ميمي ...أستغفر الله....هاي شلون بغيرتي الطايح حظهه؟]...
يلتف الزمن مثل دوشكَـ قطني على ابو علوان..ينام وهو يقرأ سورة المجادلة....فجأة يقف ابو علوان أمام محكمة قبل 5 الاف عام...أمامه حمورابي...وعن يمينه اورنمو وزير الاسكان والتعمير السومري.....يُنادى على المتهم الموقوف ابو علوان ويؤتى به بين جنود عراة الا من لباس الـ (جي سترنغ!!)....
- ابو علوان لماذا هربت من وحدتك العسكرية حين هجم العدو السنسكريتي؟
غير مصدّق..سأل احد الجنود وقال له: من هذا القاضي؟...
- شنو متعرفه ..هذا حمورابي مدير تجنيد الثورة السابعة..أبو المسلّة...شبيك مو أبو الجسر.. وين دفتر الخدمة مالتي...اني تسرحت من وحدتي اصولياً...وين التسريح مالتك....اصبرلي....يشاهد حمورابي دفتر التجنيد الخاص بابو علوان...هذا مزوّر في سوق مريدي،ويلتفت الى اورنمو...ابو اور ميمي...كَلي عدنه فقرة بمسلتنا الحكيمة مثل وصايا صدام نمو تختص بالعكَال والشطفة...لا...زين...انت الي يسمونك ...نريد جواز اصولي غير مزوّر.... شنو هاي الاوراق...لقد هزلت ياابا علوان...ماذا يريدون..هل أجلب لهم تأشيرة التسريح بالرقم الطينية مال سومر؟ يعني دفتر الخدمة يصير دبل طابوق حجري...يمكن يفيدنه ببناء البيتونة..... ادري ابو علوان انت من دورة حمورابي؟....اورنمّو...ياكاتب ضبط التجنيد... اين زوّرت كل ملفات الجنود العراقيين الاشاوس؟هل بنيت بها زقورة الهمّ الوطني؟ اشهد ايها الاله أنانا....أنهم يسرقون اعمارنا منذ حمورابي وحتى حمو خالتي...أين عشتار تلقي بروحها بيني وبين حمارابي....حتى يسرحنا تسريحاً جميلا.....]
ينهض ابو علوان من نومته ويهرع (رأستا!) إلى دفتر الخدمة العسكرية....هذوله أجدادنا العظام الظاهر كلهم مزورين وخريجين مال مريدي....المهم ابو علوان....ليلك طويل وصعب...وانت وحدك....أم علوان عايفتلك البيت...وظل البيت لمطيره....إرجع نام...لازم اكو حلم يجلّب بيك مثل حظك الأسود.....
يهرب ابو علوان من واقعه المرير إلى حلمه...وهو يشاهد وطنه ملقى على اعتاب الثقافات الأجنبية والروزخونية....اين انت ميمي....لماذا تتركيني مع الميليشيات تأخذني ذات اليمين وذات الشمال.... ينام كانه السيد التشخيري....و..ووووو....
روميو....بوجه ابو علوان...وهو يصعد شرفتها مثل عتوي مال مطابخ.... جوليت....[أبو علوان نام بدون حلاقة ذقن ولحيته أشبه بظهر قنفذ]....نعم روميو...جوليت بعد روحي روحج...لماذا يمنعنا الثأر من الحب ياسمائي التي تكتفي بنجمة انت فيها....روميو ايها الصاروخ الباليستي في زمن الأسلحة عابرة القارات....يامدفع الهم ورشّاش الفرح على ثيايي.... يامشجب ثارات هيئة علماء الحنّة....وياأهداف أُحُد المتحركة فوق رمال حياتي....لماذا اهلنا متناحرون؟ شومجلس النواب وفجّروه باسم المقاومة.... وجسر الصرافية كسروا ظهره...شيريدون بعد....كلهه تتصالخ علمود عكَال الضاري وعمامة السيّد..... بويه الوطن صلبوه مثل المسيح...والوادم كلهه شايله صلبانهه علمود تنصلب عليهه....وانتو تتعاركون.... هذا ارهاب؟ هذا مقاومة؟...وانوب كل واحد اله ناطق باسمه...شنو انتو خرسان ...طرشان..نعله عله ابو الجابكم يابو الحطّ الرقم الطينية مالتكم على دروب اليتامى.....
روميو الشيعي وجوليت السنية....يحبان بعضهما باسم ابو علوان وميمي...لايجدون سوى الموت من يوحّد بينهما حتى يتوحّد رؤساء الأفخاذ والعكَل واليشاميغ الحمر والسود والخضر والبنفسجي(هاي مال واحد سيخي ذب جرش ويه المسلمين وانوب شرد منهم لليهود...والله عمي حقه اليهود يعاملون العراقيين اشرف من الاردنيين...).ابو علوان وميمي....بحثا عن سم يشربانه ليموتا....وجدوا ان الحاجة ام الإفتراس...هم ليسوا بحاجة الا الى زيارة مليونية يذهبان بها مع الزوّار الى زيارة احد الائمة...وعلى الدرب تجيهم طلقة تايهة من احد الطرفين...فيموتا شهيدين في سبيل الوطن.....يفز ابو علوان من نومته الكَشرة....يشمر نص طاسة الماي على وجهه....خرب عرضك ابو علوان هو روميو شوكت عرف الحسين (ع)....وجوليت شوكت عرفت ابو حنيفة؟....يابه شو سويتهه دراما هندية لو مسرح تجاري مال سعد خليفة....مامحتاج بس راقصة وقزمة وواحد يشبع راشديات وابوك الله يرحمه...اقول شو انت سويتهه كلهه موت اليوم.....ابو علوان الساعة الان الثانية ليلا بعد منتصف الذل من بغداد....إنجب ونام.

قناتنا على التلغرام : https://t.me/kitabat


وجيه عباس
 (للدخول لصفحة الكاتب إضغط هنا)

    طباعة   ||   أخبر صديقك عن الموضوع   ||   إضافة تعليق   ||   التاريخ : 2013/05/31



كتابة تعليق لموضوع : حلم ليلة حيف!!
الإسم * :
بريدك الالكتروني :
نص التعليق * :
 



حمل تطبيق (كتابات في الميزان) من Google Play



اعلان هام من قبل موقع كتابات في الميزان

البحث :





الكتّاب :

الملفات :

مقالات مهمة :



 إنسانية الإمام السيستاني

 بعد إحراجهم بكشف عصيانها وخيانتهم للشعب: المرجعية الدينية العليا تـُحرج الحكومة بمخالفة كلام المعصومين.. والعاصفة تقترب!!!

 كلام موجه الى العقلاء من ابناء شعبي ( 1 )

 حقيقة الادعياء .. متمرجعون وسفراء

 قراءة في خطبة المرجعية : هل اقترب أَجلُ الحكومةِ الحالية؟!

 خطر البترية على بعض اتباع المرجعية قراءة في تاثيرات الادعياء على اتباع العلماء

 إلى دعاة المرجعية العربية العراقية ..مع كل الاحترام

 مهزلة بيان الصرخي حول سوريا

 قراءة في خطبة الجمعة ( 4 / رمضان/ 1437هـ الموافق 10/6/2016 )

 المؤسسة الدينية بين الواقع والافتراء : سلسلة مقالات للشيخ محمد مهدي الاصفي ردا على حسن الكشميري وكتابيه (جولة في دهاليز مظلمة) و(محنة الهروب من الواقع)

 الى الحميداوي ( لانتوقع منكم غير الفتنة )

 السيستاني .. رسالة مهدوية عاجلة

 من عطاء المرجعية العليا

 قراءة في فتوى الدفاع المقدس وتحصين فكر الأمة

 فتوى السيد السيستاني بالجهاد الكفائي وصداها في الصحافة العالمية

 ما هو رأي أستاذ فقهاء النجف وقم المشرّفتَين السيد الخوئي بمن غصب الخلافة ؟

 مواقف شديدة الحساسية/٢ "بانوراما" الحشد..

أحدث مقالات الكتّاب :


مقالات متنوعة :





 لنشر مقالاتكم يمكنكم مراسلتنا على info@kitabat.info

تم تأسيس الموقع بتاريخ 1/4/2010 © محمد البغدادي 

 لا تتحمل الإدارة مسؤولية ما ينشر في الموقع من الناحيتين القانونية والأخلاقية.

  Designed , Hosted & Programmed By : King 4 Host . Net