• الموقع : كتابات في الميزان .
        • القسم الرئيسي : المقالات .
              • القسم الفرعي : المقالات .
                    • الموضوع : تأمّلات... .
                          • الكاتب : سيمون عيلوطي .

تأمّلات...

عَتْمِه..!!
ما في حدا مرتاح...
 بْهَالعَجْقه وِالزّحمِه
لا طير هَالصّباح..
وْلا وَطْوَط العتمِه..،
شُبّاكي هَالفوّاح
مستنّي شي نسمِه
تْهَفْهِف على التّفاح..
وَالوَرْد بِشي نًغْمِه..،
هَالحُب وينو راح..؟؟!
قولوا وَلَوْ كلمِه..!! 
 
******
حُزُن...
الليل والأحلام والحُب العتيق
وسْنين تُمرُق بالعُمُر
 فوق الطّريق،..
ضاعت أماني 
وْفارقت قلبي وُعود
تْحسّر زماني...
وْما صفالي بالهّاوجود
غير الأسى وْخيبات
ما إلها حُدود..،..،
صامِد أنا...
بستنّى بسمِه يا بريق!!
 
******
بَلْكي...!
نْجوم تهوي بْالهَمسا 
واقْمار تاهَت عَ الدّروب
وَيْلات لَفّعْها الأسى
بِغْيوم أسود مِ الحُروب،..،
موجات تِهْلِك هَالأرِض
غَطّتْنا من طول وْعَرِض
وِنْعيش بين علّ وْعسى...
بَلْكي بْسمانا هَالفرَح
بكره يِجوب!!
 
******
خيبة أمل
يوم فَلّ الطّير مِ مْواج البرِد
من بْلادنا... 
وِصْفرّت زْرار الوّرِد..،..
والبَدِر غَطّت وِجّو
 كْوام الضّباب،..،
صُرْنا مثِل أشباح 
شَرْدَت بِالمدى
ما عاد حَدّ بْهَالعَتِم
يعرف حَدا...
ضاع الأمل عَ الدّرْب
وِتْلاشى الوَعِد!!  
 
******
بحرِة ظلام
لو تِعْرفي شو صار بِحْوالي
بحرِة ظلام تْموج
عَ قْبالي
من دونِك الدّنيا مَ إلها لون
تُمرُق سِنين وْقلبي هَالمجنون
عَ الفُرقة بَعْدو من الهَنا..
خالي..!!
-------------------------
 الناصره 
6/12/ 2016



  • المصدر : http://www.kitabat.info/subject.php?id=86891
  • تاريخ إضافة الموضوع : 2016 / 12 / 06
  • تاريخ الطباعة : 2024 / 03 / 28