• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : انا وضلعي يتامى ثنينه نشور .
                          • الكاتب : وجيه عباس .

انا وضلعي يتامى ثنينه نشور

قبل ايام قليلة شعر كاظم الزهيري بالم شديد بظهره، احدهم قال انها ( خيارة) اخذوه الى مجبرجي نظر اليه، كل تفاصيل جسمه لاتنتمي للبشر صعد على ظهره بقدمه التي تشبه قدم فيل من نسوان كبل نتج عنه رضوض وتمزق في الضلع الايسر وجراء هذا اصبح طريح الكرويته لانه لايستطيع ان ينام مثل البشر ، اتصل به وجيه عباس وسأله عن حالته قال له سارسل لك مااعانيه فكتبت له تجليبة .. وقد شارك في المساجلة الشاعران الكبيران مهدي السوداني وطاهر سلمان ..
اجلبنك يليلي او ضلعي هالمكسور 
جنت بلبل اغرد هسه نص زرزور 
دفرني بقندره مدفور ابن مدفور
ومهيدي ايتلمظ اكل تشريبه ..
اجلبنك يليلي 12 تجليبه 
*****************
رد السيد وجيه عباس قائلا..
اجلبنك يليلي برض امض من رض
نص دفره بمتن نص كرصة اخت العض
يكاظم بلوه ظهرك دومه يتمرض 
سوي شناو تطلع كل ملاعيبه ..
*************
كتبت له انا ..
يسيد للحجي ماظل بعد شراي 
ونصحني اعله مهدي انطيني منك راي
وي هارون اكل او شرب يمه الجاي 
او عزرائيل فاته او كال مدريبه 
************** 
وكتب الشاعر مهدي السوداني 
كاظم كسر ضلعه ارهابي تكفيري
واخذ نوط الفخر من ط.....ه لزهيري 
قلم لو ماكو عنده يوقع اب .....
ونام او اختم اب...... مكاتيبه 
*************** 
ورد الاستاذ وجيه عباس قائلا ..
يمهدي انكسر ضلعه او مابعد رجوه
غسلت ايدي عليه من رفت الخ......
اظن طكت عليه اليوم الف عبوه
واظن كاظم يمهدي ايصيح خلي به
**************** 
ورد الشاعر الكبير مهدي السوداني قائلا ..
اجلبنك يليلي او مانشف دمعي 
لان موجوع واحد من اعز ربعي
انكسر ضلعه واحس انه انكسر ضلعي
او بس سيد وجيه ايعرف **** 
وختمها الشاعر طاهر سلمان قائلا ..
اجلبنك يليلي والحجي مفروض
على المسكين كاظم والضلع مرضوض
من داسوا اضلوعه ما فطس محظوظ 
فيل وداس صدره وناوي تخريبه
عارف مامون يقول:
اجلبنك يليلي وضاع تدبيري
الوكت وياي حسبة توم وي جيري
رض ضلعي الدهر من رض الزهيري
وصارت گومتي للباب تحنيبه !!
...
سيد عارف يكول هاي مني لسيد وجيه
..
اجلبنك يليلي وروحي مسحونه 
اذا برضوض سهله ضلوعي مطحونه
يهل الراي فدوه بمسألة افتونه
اذا اسب الحكومه خوب مو غيبه ؟!
نصير البحار :
جل بنك يليلي وصايره امناوش
ظهره امضعضعينه وبعده يتحارش
شجابك يم وجيه ورحت تتقارش
يكاظم راح حيلك بعد شيجيبه



  • المصدر : http://www.kitabat.info/subject.php?id=58678
  • تاريخ إضافة الموضوع : 2015 / 03 / 04
  • تاريخ الطباعة : 2024 / 03 / 29