جلس المرشّح الاسلامي الجديد قرب الوزير( س)،كانت لحية المرشح ترسم ظلالا من سواد خيبتنا على خدوده ،حبّات سبحته المائة والواحد تريد ان تشترك في تعداد مآسينا القادمة بوجود صاحبها وجماعته،قال موجّها كلامه للوزير، بعد ان صلى على النبي واله، ان الاسلام يأمرنا بالتكاتف واصلاح ذات البين،الوزير يفرّ براسه لانه يدرك شخصيا عدم زواجه بأية قريبة من عشيرة المرشّح الغريب حتى الدرجة العاشرة!،المرشّح استدرك وكأنه سائق تريلة نسي ان يبدّل الكَير:

-سيادة الوزير الامثال تضرب ولاتقاس،النملة المذكورة في القرآن اتهمت سلمان النبي وزوجته بلقيس واباه داوود ع بالبخل،وحين سألها عن السبب قالت له أن أباك داود الذي ألان اللهُ له الحديد كان يعمل ليلا بمهنته من دون أن يكشف للجميع سر صناعة الحديد ولو أنه علّم الاسطوات الحدادين طريقته لاستفاد منه الناس،اما زوجته بلقيس فقد رفعت ثوبها خشية ان يتبلل بالصرح الممرّد وكأنها لاتملك ثوبا غيره،وسليمان حين طلب من الله ملكا لاينبغي لأحد غيره ابدا....تعجّب الوزير لانه لم يكن نملة حتى يكلّم نبياً مثل سليمان ع ولم يكن المرشّح شبيها بأحد أنبياء بني اسرائيل(وان كان الوزير لم ير احدا منهم)،المرشّح الاسلامي يستمر بخرطه السهو!!:

-سيادة الوزير انت لاتدري لماذا إشرأبت عينا يعقوب النبي ع...!!

استغرب الوزير من الحديث الموجّه اليه،وسأله عن مربط الفرس فقال له بعد أن ترك جلباب الدين:

- سيادة الوزير تعرف الموظف مكرود ابو تيسير اخونا،من اخوتنا المؤمنين الذين يحضرون صلاة الجمعة معنا ويساهم في خدمة ابناء الطائفة...

قاطعه الوزير:

- ابو تيسير مو المدير ابو المشتريات؟

-اي استاد!!

-موهذا خليناه مسؤول على شراء اشجار لغرض تشجير الوزارة،الشجرة يشتريها ب 5 الاف ويكتبها ب 13 الف دينار

-لا استاذ...هي الشجرة ب 8 الاف دينار ويكتبها ب13 الاف دينار!!،وبيناتنه استاذ احنه ندري بيه وكح وعنده امكسّرات اهواي،بس هاي اللجنة التحقيقية الي تحقّق وياه بهاي التهمة اني اؤكّد لك واحلفلك بدوبة قرائين! انه بريء منها براءة الذيب من دم يوسف وحرام يتعاقب على تهمة هو بريء منها وينعاف على جرائم هوه مسويهه!!... ولاتنسى استاذنا احنه مرشحين ارواحنه من اجل الدخول الى مجلس النواب في الفترة القادمة وانت تدري هواي من عدنه!! راح يصيرون بلجان النزاهة البرلمانية وانت ماتحتاج عمامة مثل عمامة صباح الساعدي يشرشب عليك من الصبح لليل!!

قاطعه الوزير وقد لمعت عيناه:

-استاذ اني هسه اعرفت ليش اشرأبت عينا يعقوب ع؟

سأله المرشح:

-استاذ ليش؟

اجابه الوزير:

-الظاهر يعقوب ع كان مخلّي عينه على الوزارة وراد يرشّح بكتلتكم ويصير وزير بمكاني!!