سنين ينكضي العمر مرة فرح مرة حزن

 كل سنة نطفي شمعة

 من عيونا تنزل دمعه

 ترسم على الكيكة 

 صور

 صور

 تشع مثل النجوم

 ترسم بالعيون حزن وسط الفرح

 وتخرس الهلهولة

 تذكرنا الفرحة

 بالغايب اللي مراح منا وما يرجع بعد

 غاب عنا

 واخذ وياه من القلب حسرة

 ويرجع الحزن يدك باب العمر مرة ومرة 

 نتذكر بيه ضحكات اكلها 

 الحرب مرة

 والذيب مرة

 الارهاب مرة 

 شجم مرة نمسح ارقام واسماء وعناويين

 شجم مرة بالعمر نزور القبور ونتذكر اللي غابوا عنا

 القهوة وسوادها تذكرنا بيهم

 صوت عبد الباسط الحزين يبجينا عليهم

 شوارع ......بيوت.......صورة.....وجوه تشبهم

 تخلي القلب يركص بالصدر لمن يسمع ب طاريهم

 عفية روح وعفية جسد

 شكد تحمل ضيم وتحمل قهر

 ويبقى ويا العمر يمسح اسماء وعناوين

 ويجيه يوم ينمسح اسمنا 

 ويبقى قطعة سودة معلكة بشوارع المدينة

 تاليها كلنا قطع سود........

 فنجان كهوة ................

 صوت عبد الباسط يبجي الناس علينا 

 والناس تبقى تعيش يوم فرح وتعيش يوم حزن

 هاي هي الدنيا 

 دولاب ويلعب بينا

 دولاب ويفر بينا.......

 وقطع سود تملى المدينة

تالي الوقت نظل قطع سود

قطع سود

تضيعنا الشوارع 

وتنسانا الايام