• الموقع : كتابات في الميزان .
        • القسم الرئيسي : المقالات .
              • القسم الفرعي : المقالات .
                    • الموضوع : الاصرار المعجوني .
                          • الكاتب : د . رافد علاء الخزاعي .

الاصرار المعجوني

اليوم عبودي الجايجي تارس (مكدس) المحل مالته قواطي وشيش معجون من كل الانواع والماركات .........

ومخلي على ميز الشاي ماعون ثريد (تشريب احمر مال لحم زنود) ويضرب بالخمسة مع البصل الاخضر.......

وهو يلطع بالتشريب قال لي تفضل دكتور وداعتك لحم طلي عراقي هرفي مذبوح على الطريقة الاسلامية مو لحم هندي اسلامي مستورد ولالحم ارجنتيني مال الكفيل مجاز من المرجعية ولا لحم سامراء برازيلي مجاز من دار الافتاء والمرة طابختها بيدها ومخلية فوق القوطية معجون كيلو طماطة ونومي بصرة وهذا البصل مال الكرمة مال الفلوجة وهذا الخبر مال طحين القمح العراقي صابر واحد غير معالج وراثيا وهذا اللبن مال كركوك والجاي مال اخوك عبودي بعد شتريد يله دكتور ميد ايدك وتوكل على الله.....

قلت له عبودي لقد اخذتني غدرا وانت معد هذه الوليمة بدون اخباري مبكرا  وهاي موامرة مسويها حتى تاكل وحدك وبعدين تجي تشتكي القولون والمغص والله الستار......

ضحك وقال دكتور اني شجازيك وانت طيبتني من الانفلونزا التركية وجعلتني شخصية مشهورة................

اجبته عبودي انت شخص راقي واني احترمك واحنا نسولف ......

دخل وسام ابو الخيل المصلاوي على الخط وبعد السلام وبدون عزيمة مد ايه وبداء يلطع مع عبودي تشريب اللحم وهو يلقم الثريد باللحم مع البصل والمرق يتساقط على قميصه وعلى شاربيه الخفيفين.......

والجميع يتغامز ويتهامس ضحكا عليه ولقمان الكردي يقول لابو الخيل المصلاوي كاكا على كفيك ترى تلحك على الثريد على كيفك على صحتك......

وابو الحصن العفو ابو الخيل يقول له كاكا لقمان والله تشريب بعرس امك  مراح تاكل مثله..........

ولقمان الكردي يضحك ويقول له والله عرس امي قريب بنيسان انشاء الله وانت حاضر ويا المعازيب لانك بمقام الوالد الغائب.............

المهم في القضية سالت عبودي قلت له ماهو السر في عرض شياشي وقواطي المعجون بالمحل شنو راح تقلبها بقالة......

قال لا دكتور بس اني كلما اسمع سياسي وكلها تسولف بالمعجون هذا يقول معجون عراقي وهذا يقول معجون وطني وهذا يقول قواطي المعجون مفخخة واريد افتهم السر وراء هذا الاصرار المعجوني...............

قلت له الا تعلم عبودي ان العراق وتركيا فقط من دول العالم لايستلذون ابدا الا بالحساء الاحمر والمرقة الحمراء المعجونية والجماعة كانوا كلهم في بلاد الغربة حسرة عليهم المرقة الحمراء  كاضيها كلها على الماجي والكاري الاصفر والجل كباب وهم حاسدين العراقيين على هاي النعمة لان حتى في الحصار لم تفارق منازلنا المرق الاحمر اعرفت عبودي الان سر الكبت المعجوني..........

ضحك عبودي ملء شدقيه وهو يصيح طماطة حمراء مجنونة بلون الدم المحرومين منه.......................

انها الطماطة المجنونة ووحش الطاوة الباذنجان وسياسة كلمن يثرد وحده واليثرد يدري والياكل مايدري.................................




  • المصدر : http://www.kitabat.info/subject.php?id=41171
  • تاريخ إضافة الموضوع : 2014 / 01 / 03
  • تاريخ الطباعة : 2024 / 03 / 28