" بالعامية المصرية "

****** 

نفسى أسأل سؤال يا بيه

هى ليه الحكومه ..

مش واضحه وصريحه

ومش عايزه تقول الحقيقه

خايفه من إيه ..

بتعمل حاجه أبيحه

وخايفه م الفضيحه

لا  مؤاخذه يعنى يابيه

        *****

الببلاوى .. ريّسها

دايما سارح مهموم

لا .. عارفين مشغول بإيه

ولا .. إيه سبب الهموم

ولمّا  حنّ علينا وإتكلم

لقينا كلامه مش مفهوم

مره شمال .. ومره يمين

وبقينا مش عارفين

الببلاوى أصلا .. مع مين

        *****

النايب بتاعه زياد

بصراحه زودها حبتين

مره يقول .. مصالحه

ومره يعلن مبادره

إنت ياعم بتاع إقتصاد

ولا .. جاى توفق بين راسين

إنت جاى عشان الرغيف

عشان الفقير يعرف يعيش

هو دا اللى فيه تفكر

وبلاش .. علينا تتمنظر

        *****

ووزير الجامعات حكايته حكايه

راجل ثورجى م البدايه

وقف مع الشباب فى الميدان

زعيم بيحلمو بزعامته

ولمّا دخل وزارته

دفن أحلامهم فى المغاره

أصله فاكرها شطاره

كلامه كله خبيث

وسكوته كمان خبيث

        *****

الحكومه تاهت فى الطريق

مش فاهمه حاجه فى الخريطه

ولمّا طلعت علينا بقانون

خلّا  الشوارع حريقه

الحكومه جابت آخرها

وإنكسرت مناخيرها

الخلاصه .. يا عم ببلاوى

إحنا جبناك عشان تداوى

زادت علينا البلاوى