ورى ماهربت من الجيش كعدت ابيت عمي .. هروبي جان علمود ضابط صغير بكصتي بوكتها ..

هالضابط حط راسه براسي ماعرف ليش

يعني لا مسويله شي اني .. ولا حتى متقرب من عنده ..

 بس لان الجنود جانو يصيحولي المثقف هو ضاج مني ..

 اكو ولد عريف كالي ترى يغار منك والله  .. كلتله على شنو يغار ؟؟ كال لان دارس و دائما يلتمون الجنود داير مدايرك و كلهم يحبوك ..

كلتله ممعقولة يمعود ..

عالعموم شبعت ظيم وياه ..

 يوميا عقوبة من لاشيء و يوميا غلط عالخالي بلاش .. كلت احسن شي اسوي اطفر و ادخل هروب و شيصير خلي يصير ..

طفرت و كعدت مثل مكلت ببيت عمي .. و كمت اشتغل وي صاحب عمي بحي صناعي .. الحي الصناعي بعد منطقتين من بيت عمي ..

مرات اروح وي ابو الشغل بسيارته الشخصية .. وطبعا هو يدري بيا طافر من الجيش و اذا جنا نلمح من بعيد انضباطية كبل نفوت بالفروع ..

بس المشكلة وين ؟

مرات تصير ظروف والسيارة مموجودة لو هو رايح بغير مكان و اني لازم اروح افتح .. هنا المشكلة ..

لان لازم اركب كوسترين يله اوصل للحي الصناعي الي اشتغل بي ..

اكو ولد فيتر ويانا .. هذا يدري بيا هارب .. كالي تدري عندي ابن اختي صارله سنة و نص هارب ومحد ملكفة و افتر العراق من الحد للحد ..

كلتله شلون اكيد عنده عدم تعرض مزور لو هوية مزوره مو ؟ كال لا ..

كلتله بشرفك شلون ؟

كال يسوي نفسه اخرس من يصعدون الانضباطية و دائما يلبس هدوم مخربطة ..

ضحكت كلتله وهاي تعبر عليهم و حتى لو تعبر اني استحي اسويها كبال الناس ..

كال تعبر عليهم لان همه بشر حالهم حالنا .. و اذا تستحي لعد طبك مرض ظل خايف و ايدك على كلبك و اجاك الذيب واجاك الواوي ..

كلتله اوكف خلي نجرب ..

كال شنجرب ؟

كلتله اذا اجه زبون هسة لمحلنا لو لمحلك خلي اني اجرب اسوي نفسي اخرس وياه و خلي نشوف ردة فعلة ماشي ..

كال يله ماشي ..

والله ورى ربع ساعة تقريبا اجه رجال سايق تكسي برازيلي لحد هسة اتذكر جان يريد يصلح الدرايم شفت ..

اني استقبلته و سويت نفسي اخرس و اطرش وياه ..

مشت عالرجال و هاي جانت اول مرة بحياتي اسوي هالشي والله العظيم ..

عرفت وراها انو صدك الناس تصدك بس بقت بيا خوفة انو الانضباطية اخاف يلكفوني و كلت خلي اجرب هي خربانة خربانة ..

و كمت اني ادور على الشرطة بالشارع لو الانضباطية وافوت مقابيلهم .. بس الشي المضحك مجانو يوكفوني و لا يصيحوني ولا الحك اسوي نفسي اخرس كبالهم ..

يعني لان اريد اجرب هههههههههههههه محد يكلي تعال انطيني هويتك ..

الحاصل كمت اركب كوستر و صدك والله تلث مرات وكفونا و مشت عليهم سالفة الاخرس .. بس المشكلة بهل السالفة لازم حتى كبال العبرية (الركاب يعني) امثل الدور ..

لان الناس متنحزر ...

عالعموم بقيت هارب تقريبا ثمن اشهر محد ملكفني الى ان اجه اليوم الي غير حياتي كلها و حقيقة غير حياتي كلها ..

فد يوم كالعادة طالع من بيت عمي و رايح للشغل .. صعدت كوستر جانت تقريبا مقبطة بس اكو مكان واحد فارغ ..

هالمكان كرسي ابو نفرين و بصف الشباك كاعدة وحدة تخبل .. مبينة طالبة  ..

انيقة و مرتبه و حلوة و مبينة واثقة من نفسها كلش ..

كعدت بصفها و جنت كلش خايف لا هدومي المدهنة تطخ هدومها و توسخها .. الى درجة كعدتي جانت مو كعدة طبيعية ..

و الي يشوفني يضحك لان حاط ايدي على رجليناتي شلون البنات من يكعدون ههههههههههههه ..

اني احمد الله واشكره شكلي مقبول .. و طويل ..

زين بهل الكعدة صرت شي نشاز كلش .. هي ماعرف شلون انتبهت عليا و خلت كلينكس بيدها وحطت الكلينكس على وجهها و كامت تضحك بس مبين  دتضحك هههههههههه .. اني هم ماعرف شلون كلتلها ضحكي ضحكي ..

هي حجت بصوت ناصي كالت مو بله ؟

كلتلها اي بله و اني صوجي خايف على هدومج .. تدرين من ركبت لحد هسة ادعي بكلبي لاتصير طسه حتى لا اطخج بهدومي غصبا ما عليا و تدهنين ..

اني من كلت هيج كامت تضحك اكثر و كالت صدك تحجي ؟ كلتلها والله ..

و بدينا نحجي اني وياها .. كلتلها ترى اني هم داومت كليه واعرف البنية لازم تروح للدوام مرتبه ..

كالت انت مداوم كلية ؟

كلتلها و داومت بفلان قسم و كمت احجيلها و حسيت البنية انعجبت بيا .. و بصراحة اني هم انعجبت بيها ..

بس سبحان الله مو كلشي حلو يكمل ..

طرببببببببببببببب ..

سيطرة انضباطية ههههههههههههه والله العظيم والله العظيم طريق الكوستر هذا نادر و بالاحلام توكف بي سيطرة ..

بس على حظي وكفونا ..

طبعا اني توترت وهي حست بهل الشي ..

زين

كمت احجي بيني وبين نفسي .. كلت اسوي نفسي اخرس وخبل !!

زين اذا اسوي نفسي اخرس وخبل هيبتي تروح كبال البنية و اكيد راح تكول هذا كل حجية جذب وياريت لو بس عالبنية وبس .. الناس كلهم شافوني احجي وياها و اسولف وياها يعني مكشوف مكشوف ..

زين بلكي ميطلبون هويتي يارب ..

و انفتحت باب الكوستر و صعد الانضباطي .. اني بين الي اريد اسوي و بين الي ماريد ..

و اول واحد طلب هويته اني ..

كلت يله مدام طلب هويتي خلص ملزوم ملزوم .. كبل سويت نفسي افتش بجيوبي وكلتله نسيتها بالبيت ..

كال انزل هههههههههههه و حسيته يريد يكول انزل و خلي يولن ..

بس الحمدلله مكال خلي يولن ..

باوعت عالبنية و ابتسمت ابتسامة خفيفة و كلتلها من رخصتج الضاهر مالنا قسمة نخلص حجينا .. البنية شكلها انكلب و صدك حسيتها انقهرت عليا و خايفة عليا وهالنظرة الي بعيونها هي الي صبرتني بكل فترة السجن ..

حبيتها من هالنظرة والله العظيم ..

نزلت و مجنت مهتم لا للانضباطية ولا حتى خايف من السجن و لا حتى اسمع الي ديكوله الانضباطية بيناتهم .. عيني صارت عالكوستر بس و شفتها شلون تباع عليا خطية و دارت حتى راسها من مشت الكوستر (لان ابو الكوستر وراها اكيد يروح خو ميبقى ينتظرني وياه ناس و مصالح ناس .. و اصلا الانضباطية يكولوله اطلع ) ..

راحت الكوستر واني هم ركبت وياهم و كبل للحارثية و من الحارثية سفروني لوحدتي العسكرية بعد محجيتلهم كل معلوماتي ..

عالعموم ...

انسجنت .. بس والله العظيم كل همي اطلع حتى اشوف نفس البنية .. لان عرفت هي تداوم بالتراث من حجيت وياها كالتلي هالشي ..

و اكيد بيتهم بنفس منطقة بيت عمي بس ماعرف وين ..

كل همي اخلص السجن و اطلع اروحلها ..

و خلصت السجن و طلعت و رجعت لبيتنا عادي .. ابوية بوقتها كالي بوية لاتهرب بعد .. لان هي براسك براسك و غصبا ماعليك تخلصها (يقصد عالعسكرية) ..

كلتله يابه وعيونك وداعة هاي امي مو هربت لان متعاجز منها .. بس هالضابط حاط راسه براسي و شبعني اهانة .. كالي والله ماعرف شكلك ..

و سبحان الله و بفضل من الله ماعرف على حظي على حظ اهلي و دعاء امي .. الضابط ورى فترة انقل ..

المهم ..

ورى مرجعت لبيتنا و داومت بالعسكرية عادي ..

بالاجازة مالتي رتبت نفسي وقررت اروح للتراث اشوفها للبنية ..

بس المشكلة ماعندي عرف بالكلية ولازم اضرب ركن هناك و اكعد ادور بالوجوه لحد ما الكاها .. و طبعا اني اجازتي كلها اسبوع ..

بس الي يريد شي يعوف شي ..

و سويتها ورحت ..

و بأول يوم مشفتها .. و ثاني يوم هم مشفتها .. بعدين كلت بيني وبين نفسي .. اني شكو جاي هنا و متعب نفسي ..

خوب اروح بوقت نهاية دوامهم يم الكوسترات الي تروح لمنطقة بيت عمي .. واكيد راح تجي تريد تصعد والكفها .. لان الكوسترات تقبط وحدة وحدة ..

و مبين كبالي العبرية الي يصعدون واحد واحد ..

و صدك والله ورحت هناك و جان الكفها للعينتين .. و كبل صعدت بصفها ..

كالت لاتكول صدفة ؟

كلتلها لا والله ابد مو صدفة ...

كالت تصدك بالله العظيم يوميا من تفوت الكوستر بالمكان الي صعدت بي ابقى اباوع اكول هسة تركب انته ؟ كلتلها تصدكين بالله العظيم نظرتج وهاي عيونج مراحت من بالي طول فترة السجن .. كالت اسم الله سجن ؟ كلتلها اني جنت طافر من العسكرية و هيج وهيج وهيج حجيتلها كلشي بس مقتطفات مقتطفات ..

و من يومها بدت علاقتي بيها ..

كمت احبها وهي هم حبتني .. جنت بكل اجازة اروح عليها و نحجي ونسولف .. بس للأسف لا احنا عدنا تلفون ارضي ولا حتى همه ..

يعني بوقتها علاقتنا جانت بلا مواعيد .. على الغفلة و على التخمين ..

يعني ( اكلها يمكن بفلان تاريخ نتشاوف ) .. وهي خطية تكعد تحسب فلان تاريخ يصادف عطلة لو لا ..

عالعموم بقت علاقتي بيها و زادت كلش لحد مخلصت عسكرية والحمدلله كظت عسكريتي على خير ورى ما انقل الضابط لغير وحدة ..

و قررت اخطبها بعد موافقة ابوية و امي و اخوية الجبير طبعا بس قبل هالشي اشتغلت شغلة زينة حتى اهلها ميكولون شي ..

و طبعا هي فاتحة اهلها بهل الحجي و بالمناسبة ابوها رجال مهندس مدني و جدا مثقف و متفتح ..

يعني البنية حجتله كلشي من وقت متعارفنا لحد لحظة اني طلبت ايدها و كلتلها كولي لأهلج ..

الرجال تفهم الموضوع و رحنا و خطبناها و تمت الموافقة و صارت من قسمتي ..

و تزوجت ورى فترة و الحمدلله والشكر مر عالسالفة سنين والله رزقني بولد ثنين ..

بس مرات اصفن بيني و بين نفسي ..

اكول بله لو اني بيومها لو مسوي نفسي مخبل و اخرس مثل كل مرة !

جان بقت وياي ..

و طبعا حجيتلها هالشي هههههههههههه كالت تريد الصدك لو الجذب ؟ كلتلها الصدك ؟ كالت لان انت مجبور تسوي هالشي مراح اهتم ..

و طبعا بيومها من حجيتلها هالشي حلفتني بالكائنات كلها الا اسوي كبالها نفس الشي و جان تطلع من الصالة و تفتح باب الصالة و تطلب هويتي عود هههههههههههههه واني اسوي هالشي كبالها ..

تخرب من الضحك وتكلي عيد عيد ..

اكلها لج شعيد هههههههههههههههههه .. تكلي عيد المشهد بشرفك ..

و صارت بيها عادة كل متضوج تكلي تعال نلعب لعبة الانضباطية هههه ..

طبعا هالحجي مر عليه هواي سنين بس بعده يضحكها هالشي .. ومرات من اشوفها مهمومة اكلها نلعب لعبة الانضباطية حتى بس اضحككها ..

الله يحفظها اليا و يحفظكم يارب ..

( القدر محد يتوقعة )