• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : الست سلامه ... .
                          • الكاتب : احمد لعيبي .

الست سلامه ...

بالمتوسطة كانت ازمة مدرسين عدنا مثل ازمة الشرفاء بوطن الانبياء..
ومرات يتأخر المدرس لحد نص السنه مثل واقعنا بعد كل دورة انتخابية من يتاخر تشكيل الحكومة واحنه ما مفتهمين شي ..
ويجي المدرس ياخذنا بالدرس الاول والثاني والفرصة مثل وزير تحلاله الشغلة لو رئيس وزراء يلزك لزكة جونسن وما يهدنا الا منعول سلفه سلفانه..
وطبعا مثل تسريبات ترشيح رئيس الوزراء اللي تنتشر كل دورة انتشرت اشاعه على انه مدرس الكيمياء راح يجي بامر من التربية وطبعا تأخر مدرس الكيمياء لقبل نص السنه بكم يوم والمفاجأة انه انثى وليس ذكر ...!!
طبعا شباب توهم مراهقين وسمعوا مدرسة جايه وتدرس كيمياء المادة اللي اكثرنا يكرهها كان بمثابة فرحة مثل فرحتنا من كلنا ماكو ولي الا علي وانريد حاكم جعفري ..!!
طبعا الكارثة الثانية عرفنا اسمها وديانتها مثل كل مسؤول عراقي نسال عليه... سني... شيعي ...كردي اسلامي... علماني ...!
وكان اسمها سلامه وهي من اخوتنا واحبتنا الصابئة المندائيين ..
طبعا كنا يوميه نسوي حفلة لاستقبالها قبل لا تجي للمدرسة ونغني بصوت عالي ( سلمه يا سلامه خنتي العهد وياي ..والليل ما نامه ...الخ )..
وفد يوم سوينه جلسة واحنه نغني الاغنية المعروفة والمشهورة سلمه يا سلامه وجان تكبس علينه ست سلامه وتدخل للصف ..!!
طبعا صرنا شلون مسؤول محلي يكعد الصبح ويلكه الناس واكفين بباب دائرته متظاهرين لا يكدر يشرد ولا يكدر يحجي وظل بس يباوع بعيونه...!!

طبعا ست سلامه ما رزلتنه تماما مثل شعبنا اللي ما طيح له حظ مسؤول ابد وبقه ساكت ..!!

مثل رئيس الوزراء اللي ما يوم سحله وزير ورزله وطرده خارج الكابينه الوزارية ..!!
مثل اي وزير ما يكدر يصيحله بمدير عام او مدير قسم او مسؤول شعبة ..
ست سلامه كان رائعه ونبيلة وطيبة وبنفس الوقت ما تحملت الموقف وردتها علينه برزالة غسل ولبس ..بدون ما تغلط او تهدد او تتوعد مثل دولة فلان او سماحة فلان او سيادة فلان ...
كالت كم كلمة اتذكر منها كم جملة منها (اعتبروني اختكم تقبلون واحد يتجاوز على اختكم هيج..اعتبروني انسانه غريبة واستنجدت بيكم ..زين هي هاي اخلاق شباب راح يتخرجون ويبنون وطن ..شبيكم شجاكم ..عموما شكرا جزيلا الكم )..!
اتذكرت كلماتها واتذكرت الجماعه يعني معقولة العراق هيج تسون وياه ..اعتبروه دولة بيها خيمة حمتكم ..اعتبروه مطعم وشبعكم ..اعتبروه بنك وتستلمون منه مليارات يوميه..اعتبروه اخوكم ابوكم ..ولكم ليش هيج وي العراق مو دمرتوه ..!!
الله لا يوفقكم ..وما اكول شكرا جزيلا مثل ست سلامه العظيمه بل اقول تتلكونها بعافيتكم ..!! 




  • المصدر : http://www.kitabat.info/subject.php?id=130978
  • تاريخ إضافة الموضوع : 2019 / 03 / 05
  • تاريخ الطباعة : 2019 / 11 / 16