سبع عباس ابو الكلفة يسمّونه

ابن امّ البنين الطاهره عونه

..............

گمر هاشم چبيره شگد مصيبتكم

عجيبه الگوم عالباطل تنازعكم

خسر كلمن يحاربنه لمحبّتكم

تلف ودّور خصومك بيك مفتونه

سبع عباس ابو الكلفة يسمّونه

ابن امّ البنين الطاهره عونه

..............

شحلات الدمعه عالعباس وعلومه

عليه الشيعه والافلاك مالومه

تمر ايّام فلا يوم المثل يومه

نظل نذكر مصابك لو يگطعونه

سبع عباس ابو الكلفة يسمّونه

ابن امّ البنين الطاهره عونه

..............

يبو الغيره الوفه منّك تعلّمناه

صحت مَشْرب لذيذ الماي وتْمنّاه

لخويه حسين عطشان وعياله وياه

اموت ومااشوف الدمعه بعيونه

سبع عباس ابو الكلفة يسمّونه

ابن امّ البنين الطاهره عونه

..............

ابو الشِدّه ابن حيدر يعرفونك

تجيك الناس عد گبرك يسئلونك

شفيع الهم لعِد ربهم يريدونك

نِعَم والله ابو الحاجات تلگونه

سبع عباس ابو الكلفة يسمّونه

ابن امّ البنين الطاهره عونه

..............

كفيل اختك يبو الطيبات يا ضيغم

خدرها يصيح يا عباس يا بلسم

منو مثلك لخيته حزام ومحشّم

بعد فگدك يخويه الگوم سلبونه

سبع عباس ابو الكلفة يسمّونه

ابن امّ البنين الطاهره عونه

..............

سلام الله على روحك يمولانه

نجم يلمع يظلّ اسمك يمنوانه

امين الرايه والخدّر يصيوانه

عزيز امّه ابو النوماس تعرفونه

سبع عباس ابو الكلفة يسمّونه

ابن امّ البنين الطاهره عونه