• الموقع : كتابات في الميزان .
        • القسم الرئيسي : المقالات .
              • القسم الفرعي : المقالات .
                    • الموضوع : عود ليش؟ .
                          • الكاتب : جعفر الونان .

عود ليش؟

 ليش احنه مانذكر الناس الزينة الا بعد موتها ونخاف نكول فلان زين وفلان مو زين؟ 

 ليش الانسان ينسى المواقف الايجابية ويذكر فقط المواقف السلبية؟ 
ليش الانسان في الغدر والطعن سريع التفاعل والتصرف، بينما الوفاء نسبته قليلة؟ 
ليش مانكثر من الابتسامة  امام الناس الي انحبهم ونريد خاطرهم؟ ليش احنه شعب مغضب الحاجبين؟
ليش  احنه نتمسك بكل شيء جاي من خلف الحدود ونعتبره مميز؟ 
ليش الحياة تغيرت، صرت زور اقاربك على مصلحة، زور صديقك على مصلحة، منو يذكر ايام الحصار والضيم شلون جانت العلاقات الاجتماعية بين الناس حلوة وبسيط ومابيها مصالح؟!
ليش احنه من دون الناس اذا برز بينا واحد اول شيء نستهزء بيه ثاني شيء نسقطة دفن وعلى البطيء؟ 
ليش الموظف بالعراق اذا يجيد مسح الاكتاف ينجم واذا عنده مبادئ مو يجمدوه بل حتى ثلج فوكاه يخلون؟ 
ليش القادة والزعماء يقربون حاشية تجيد اللواكة ويبعدون كل من يقول لهم هذا البياض بياضا وهذا السواد سوادا؟ 
ليش احنه في مجتمعنا نسبة الكسل عالية ومرتفعة كلش؟ 
ليش احنه احنه ماعدنا تلقائية  دائما اصطناع، اذا نحجي، اذا نلبس، اذا نحب، اذا نشتغل، كل شيء بينه اصطناع ونظهر مالايوجد ونخفي مايوجد؟!
ليش احنه ماناقاش افكار وانما شخصية من يطلق تلك الافكار، ونسقط عليهم اشياء جبيرة؟ 
ليش دائما نسبة النقاد والمسولفجية اكثر بكثير من نسبة العمال واليشتغلون يشهر بهم ويعرض؟




  • المصدر : http://www.kitabat.info/subject.php?id=117390
  • تاريخ إضافة الموضوع : 2018 / 03 / 29
  • تاريخ الطباعة : 2024 / 03 / 29