• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : هم ترتاح ؟ .
                          • الكاتب : حامد گعيد الجبوري .

هم ترتاح ؟


مهداة لصديقي الشاعر الراحل (علي الشباني ) بمناسبة أربعينيتة
هم ترتاح ؟
كضه عمرك حزن ...
وهموم فوك هموم
مشيت وما حنيت الراس
أغانيك فرح وشموع
تراتيلك عزيمه
وكابلت سفاح ...
              هم ترتاح ؟
محطتكم ( قطار الموت )1
مر أبخاطره المكسور
فراكينه صبر وجروح
وكف بيها ...
            أبونين وصاح ...
                          أشوكت ترتاح ؟
عمرك شيَّب أبعشرين
وطولك خيزران
وجف طراوه
أيلاوي فج الخوف
علَّـه فوك البيادر
فكرك الوضاح ...
                     هم ترتاح ؟

يا أول ( شيوعي ) أيبوك ...
باك ( الرونيو)2 ...
                      وسنطه
طبّع بيها الفكر
ويدرِّس الطلاب
ويوِّعي الشغيله
العامل وفلاح ...
                 هم ترتاح ؟
زناجيل الحبس ترثيك
        و( الحله ) 3 وسجنها ...
و(نكرة السلمان) 4 ...
أنكسر ضلع ( السراي ) 5
الضيّع الأحلام
وزنزانة ( مظفر ) 6
                      والدمع سفاح ...
                                      هم ترتاح ؟
روّه منك ( فرات )
وعرف طعم البيك
طعم ( حزبك ) وطن
ويفيض بالخيرات
رُبَـه بين النخل
وصرايف الفقره
شرب حد الثماله
            وما تكضه صفاح ...
                             هم ترتاح ؟
ترافه خطوتك
ومشيت فوك ( الماي ) 7
أبهيد ... أبهيد
لا زلت رجِل ...
وتفارك الماشاك
درب موحش طويل
وما كلت تعبان ...
خطوه أبخطوه يمشي
( طارق ) 8 ويحدي ...
( عزيز ) 9 وتحفظ  الألحان
جدَم تندل دربها
             ومو مسير أشباح ...
                              هم ترتاح ؟
من زمان ميت ...
مو مثل هل الموت
حفرولك كبر
وعيون مسمومات
رادولك تموت وبيك ...
                   ... سبع أرواح
                                 هم ترتاح ؟
حاسب جيّـِته
وتانيته ملك الموت
تلكيته أبفرح وبخور ...
وسطر آخر قصيده أنهيت
خلّـص صفنته ...
              وما خلصت الأقداح
                               هم ترتاح ؟
لملمت الكتب خليتها أبكلبك
وعدد آخر جريده ...
 من  ( الطريق )10 وياك
ما خذ صوغتك للموته ...
هم يردون !!!
تسمِّعهم ونين الأهل ...
 والجيران
وأحزان الوطن
وهموم الحديثات
وصرخات اليتامى
ودمعة الأطفال
وطن يبجي الوطن ...
                 مو دمعة التمساح ...
                               هم ترتاح ؟
أول ليلة وحشة
والكبور هواي
يمك جم شهيد اليشتكي أهمومه
ويفرك راحته ...
             ويعض أصابيعه
يسألك عالوطن ...
للساع ما مبيوع
وأطفال الوطن
 من مر عليهم عيد
ذبوها الجرود11 الماتضوك الماي
ولبسوا للثياب أمطرزات ...
                        أبخيط البريسم
ومدارسهم تغني ...
                 وتركص الأفراح ...
                                هم ترتاح ؟
أول ليله وحشه ...
وللفجر طالت
تُنطر للحساب
أشحاسبت روحك
كيعانك صباخه وتنغسل بالدم
أبشرايين الوطن حد آخر الكطرات
شربت وأرتوت
وأنزرعت الشتلات
أنفضت كل التعب
من ورّد الجوري ...
شبّو ... الياسمين ..
وراسقي الفواح 
نشّفت العرك
         والغيرك القداح
           وزعوها مغانم
                  وشوكت ترتاح ؟ ...
                         هم ترتاح ؟
                               هم ترتاح ؟
                                  ما ترتاح ؟

                          ********

1 : إشارة لقطار الموت 2 : جهاز تطبع به الأسئلة المدرسية أستعاره – سرقه - الراحل ليطبع به مناشير الحزب الشيوعي وأعاده لمحله وكشفت الخيوط ومسك وحوكم وسجن 3 ، 4 ، 5 : سجون ومعتقلات للأنظمة الدكتاتورية المتعاقبة 6 : إشارة الى الرمز العراقي الوطني مظفر النواب الذي تعرف عليه الراحل الشباني بسجن الحلة الدكتاتوري 7 : خطوات على الماء ديوان شعري أصدره الراحلون طارق ياسين وعزيز السماوي وعلي الشباني  8 : الشاعر الكبير الراحل طارق ياسين 9 : الشاعر الكبير الراحل عزيز السماوي  10 : جريدة طريق الشعب 11 : الملابس القديمة البالية  .
           
 




  • المصدر : http://www.kitabat.info/subject.php?id=11595
  • تاريخ إضافة الموضوع : 2011 / 11 / 23
  • تاريخ الطباعة : 2024 / 03 / 29